काठमाडौँ । सामाजिक सञ्जालमा सक्रिय फ्रिलान्स लेखक दिल निशानी मगरले नेपालभर भएका विकास निर्माणका तस्बिरहरू सार्वजनिक गर्दै देशमा भएको वास्तविक प्रगतिलाई देखाउने अभियान सुरु गरेका छन् ।
निशानी भन्छन्–यो मेरो एक महिने अभियान हो । सबैले साथ दिनु पर्छ, ‘देश सक्कियो, बर्दाब भयो’ भन्ने भाष्य बदल्नु पर्छ। विकास त लुकाएर राखिएको रहेछ ।’ उनका अनुसार देशभरीबाट आएका तस्बिरहरूले उनलाई अचम्मित बनाएको छ । उनले भने, ‘युरोप–अमेरिकाजस्तो सडक अनि सरकारी कार्यलयहरू देख्दा म त छक्कै परेँ ।’
अभियान अन्तर्गत, निशानीले महाकालीमा बनेको चार लेनको पुलदेखि सुदूरपूर्व पाँचथरको फाल्गुनन्द गाउँपालिकाको भवनसम्मका तस्बिरहरू सामाजिक सञ्जालमा साझा गरेका छन् । साथै, शिक्षा, स्वास्थ्य, सकड, विद्युततलगायतका क्षेत्रमा भएका प्रगतिका उदाहरण पनि उनले प्रस्तुत गरेका छन् ।
उनले प्राकृतिक दृश्यको तस्बिर नदिन आग्रह गरेका छन् । ‘अभियानको उद्देश्य देशभरका विकास परियोजनालाई जनतासम्म पुर्याउनु र सकारात्मक दृष्टिकोण सिर्जना गर्नु हो ।’ उनले थपे, ‘देशमा देखाइनुपर्ने कुरा लुकाइएको छ । स्थानीय जनप्रतिनिधिले गरेको कामलाई नजरअन्दाज गरिएको छ । न्यु मिडियामा नकारात्मकताको बाढी आएको छ । बाटो, स्कूल, अस्पताल, बिजुलीजस्ता पूर्वाधार सन्तोषजनक छन् । विकासका कुरा जुनसुकै सरकारको भए पनि भन्न डराउनु पर्दैन ।’
उनको अभियानले नेपालमा भएको वास्तविक विकासलाई उजागर गर्ने र जनतामा सकारात्मक दृष्टिकोण फैलाउने लक्ष्य राखेको छ । यो अभियान एकमहिना सम्म चलाउने उनको योजना छ । अभियानमा जोडिन सबैलाई आग्रह समेत गरेका छन् ।