काठमाडौं । समाज कल्याण परिषद्ले राजधानीको भृकुटीमण्डपभित्र कार्यालय तथा व्यवसाय सञ्चालन गरी लामो समयदेखि भाडा नतिर्ने संस्थाहरूमाथि कडा कारबाही सुरु गरेको छ । परिषद्ले रिपोटर्स क्लव, काठमाडौं पुस्तकालय, फोटो पत्रकार महासंघ, अपाङ्ग महासंघ लगायत
सहित २० वटा विभिन्न कार्यालय र व्यावसायिक संरचनामा तालाबन्दी गरेको हो ।

पटक–पटक सार्वजनिक सूचना जारी गर्दा र ताकेता गर्दा समेत भाडा तिर्न अटेर गरेपछि बाध्य भएर तालाबन्दी गर्नु परेको परिषद्ले जनाएको छ ।
१० करोड बक्यौता, ताला लागेका मुख्य संस्थाहरू
परिषद्का सदस्य सचिव सरोज कुमार शर्माका अनुसार भृकुटीमण्डप क्षेत्रमा रहेका विभिन्न सङ्घ–संस्था र व्यवसायबाट हाल १० करोड रुपैयाँभन्दा बढी भाडा असुल हुन बाँकी छ ।
“हामीले धेरै पटक समय दियौँ, तर भाडा बुझाउन कसैले चासो देखाएनन्,” सदस्य सचिव शर्माले भन्नुभयो, “त्यसैले पहिलो चरणमा २० वटा संरचनामा ताला लगाएका छौँ । अब भृकुटीमण्डपभित्र रहेका सबै संरचनालाई पूर्ण रूपमा व्यवस्थित गरिनेछ ।”
परिषद्ले ताला लगाइएका ती कार्यालय तथा व्यवसायहरूलाई सात दिनभित्र सम्पूर्ण बक्यौता रकम बुझाउन निर्देशन दिएको छ । तोकिएको समयभित्र रकम नबुझाएमा कानुन बमोजिम थप कडा प्रक्रिया अगाडि बढाइने परिषद्को चेतावनी छ ।
महिला, बालबालिका तथा ज्येष्ठ नागरिक मन्त्री सीता बादीको विशेष निर्देशनपछि परिषद्ले यो कडा कदम चालेको हो । मन्त्री बादीले सरकारी सम्पत्तिको दोहन रोक्न र वर्षौँदेखि उठ्न नसकेको राजस्व सङ्कलन गर्न कडा निर्देशन दिनुभएको थियो ।
भृकुटीमण्डप क्षेत्रमा अवस्थित प्रदर्शनी कक्ष, पसल र कार्यालयहरूले वर्षौँदेखि न्यून भाडामा बस्दै आएको र त्यो समेत नतिर्ने गरेको गुनासो बढ्दै गएको थियो । परिषद्को यो पछिल्लो ‘एक्सन’ सँगै भृकुटीमण्डपको व्यवस्थापनमा सुधार आउने र राज्यकोषमा ठुलो रकम जम्मा हुने अपेक्षा गरिएको छ ।