काठमाडौं। बिहीबार सम्पन्न चुनावको नतिजा सार्वजनिक भएसँगै बंगलादेशको राजनीति अब दक्षिणपन्थी बाटोतर्फ मोडिएको छ । यस निर्वाचनको अनौपचारिक नतिजामा बंगलादेश नेशनलिस्ट पार्टी बीएनपीले दुई तिहाइ बहुमत प्राप्त गरेको छ ।
बंगलादेशको द डेली स्टारले जनाएअनुसार कुल २ सय ९९ सिट रहेको बंगलादेशी संसदमा बीएनपीले २ सय १० सिट प्राप्त गरेको छ । दोस्रो भएको इस्लामवादी पार्टी जमात ए इस्लामी र उसका साझेदारले ६९ सिट प्राप्त गरेका छन् ।
इस्लामी आन्दोलन बंगलादेशले एक र अन्य पार्टीले छ सिट पाएका छन् ।
निर्वाचनमा जित हासिल गरेपनि पार्टीले सडकमा विजयोत्सव नमनाउने जनाएको छ । बरु, मस्जिदमा शुक्रबारको नमाज पढ्न आफ्ना समर्थकलाई बीएनपीले आह्वान गरेको छ ।
तत्कालीन राष्ट्रपति जियाउर रहमानले सन् १९७८ मा स्थापना गरेको बीएनपी बंगलादेशी राष्ट्रवादको हिमायती मानिन्छ । लामो समयसम्म यस पार्टीलाई रहमानकी श्रीमती तथा वर्तमान बीएनपी नेता तारिक रहमानकी आमा बेगम खालिदा जियाले नेतृत्व गरेकी थिइन् ।