काठमाडौं। आइसिसी टी–२० विश्वकप अगाडिको अन्तिम अभ्यास खेल नेपालका कप्तान रोहित पौडेलले नखेल्ने भएका छन् ।

अहिले चेन्नईमा हुने क्यानडाविरुद्धको अभ्यास खेलको कप्तानी रोहितको अनुपस्थितिमा उपकप्तान दीपेन्द्र सिंह ऐरीले गर्दैछन् । मुम्बईमा विश्वकप टिम क्याप्टेन्स मिटमा सहभागी रोहित गएपछि क्यानडाविरुद्धको खेलको कप्तानी दीपेन्द्रले पाएका हुन् ।

पहिलो खेल संयुक्त अरब इमिरेट्स (युएई)सँग खेलेमा सात विकेटको जित निकालेको नेपाल अन्तिम खेलमा एसोसिएट टोली क्यानडासँग भिड्न लागेको हो ।

नेपाल र क्यानडाबीचको खेल चेन्नईस्थित एमए चिदाबरम मैदानमा हुँदैछ। नेपाल र क्यानडाको खेल दिउँसो १ बजेर १५ मिनेटमा सुरु हुँदैछ । यसअघि मङ्गलबार नेपालले पहिलो अभ्यास खेलमा यूएईलाई सात विकेटले हराएको थियो।