कास्कीको रुपा गाउँपालिकाले किसानलाई अनुदान सहयोग प्रदान गर्दै लसुन र प्याजको व्यावसायिक खेती विस्तार गरिरहेको छ । गाउँपालिकाले चालु आर्थिक वर्षमा एक लाख ७५ हजार किलो लसुन र प्याज उत्पादन गर्ने लक्ष्य लिएको छ ।
अघिल्लो वर्ष नमूना परीक्षणका रूपमा लसुन र प्याज खेती सुरु गरिएको थियो । परीक्षण सफल भएपछि यस वर्ष किसानलाई अनुदान सहयोगमार्फत व्यावसायिक खेतीतर्फ आकर्षित गरिएको गाउँपालिकाका अध्यक्ष नवराज ओझाले जानकारी दिए । उनका अनुसार गाउँपालिकाका सातवटै वडामा करिब ४०० रोपनी क्षेत्रफलमा लसुन र प्याज खेती भइरहेको छ ।
स्यास्त्री, दर्गामटार, पोल्याङटार, तागेडाँडा, खाल्टे, देउराली, देउराली फेदी, चिसापानी तथा खोलाको छेउछाउका क्षेत्रहरूमा व्यावसायिक रूपमा लसुन र प्याज खेती गरिएको अध्यक्ष ओझाले बताए । गाउँपालिकाले लसुन खेतीका लागि प्रतिरोपनी १० हजार रुपैयाँ र प्याज खेतीका लागि प्रतिरोपनी आठ हजार रुपैयाँ अनुदान उपलब्ध गराएको छ ।
यसैगरी, गाउँपालिकाले अदुवा खेतीलाई पनि प्राथमिकतामा राखेको छ। किसानलाई अदुवाको बीउ अनुदानमा वितरण गरिएको र हाल पालिकाभित्र करिब २५० रोपनी क्षेत्रफलमा अदुवा खेती भइरहेको अध्यक्ष ओझाले जानकारी दिए । यस वर्ष करिब ८० हजार किलो अदुवा उत्पादन हुने अनुमान गरिएको छ ।
“पालिकाका विभिन्न स्थानमा लगाइएको अदुवा राम्रोसँग फलेको छ,” अध्यक्ष ओझाले भने, “एक किलो बीउ रोप्दा एक डोकोसम्म उत्पादन भएको किसानहरूले बताएका छन् ।”
व्यावसायिक कृषितर्फ युवाहरूको आकर्षण बढ्दै गएको उल्लेख गर्दै अध्यक्ष ओझाले गाउँपालिकाले स्वरोजगार प्रवर्द्धनलाई प्राथमिकतामा राखेको बताए । उनका अनुसार हाल एक सयभन्दा बढी युवा व्यावसायिक कृषिमा संलग्न भएका छन् ।