धदिङ। निलकण्ठ नगरपालिका वडा नम्बर ३, बीचबजारमा रहेको “नुवाकोट फाष्ट फुड एण्ड क्याफे : च्वास्स झोल मःम” पसलमा मःम खाएका १२ जना मानिस बिरामी परेका छन् । मःम खाएपछि स्वास्थ्यमा समस्या देखिएका उनीहरूलाई उपचारका लागि धादिङ अस्पताल पुर्‍याइएको थियो ।
धादिङ अस्पतालका निमित्त अस्पताल निर्देशक महासेठका अनुसार दुई दिनअघि अस्पताल ल्याइएका बिरामीहरूमध्ये २ जनालाई सोही दिन डिस्चार्ज गरिएको थियो । बाँकी बिरामीहरूमध्ये ६ जनाको अवस्थालाई ध्यानमा राख्दै अझै पनि अस्पतालमा भर्ना गरेर उपचार भइरहेको उहाँले जानकारी दिनुभयो ।
जिल्ला अनुगमन समितिद्वारा अनुगमन र निर्देशन
क्याफेमा मःम खाएर मानिसहरू बिरामी परेको खबर सार्वजनिक भएलगत्तै जिल्ला अनुगमन समितिले उक्त होटलको आकस्मिक अनुगमन गरेको छ ।
अनुगमनका क्रममा समितिले होटल संचालकलाई सरसफाइ र खानेकुराको शुद्धतामा गम्भीर ध्यान दिन निर्देशन दिएको छ । जिल्ला अनुगमन समितिका सदस्यसचिव एवं उद्योग तथा वाणिज्य कार्यालयका प्रमुख चुडामणि पुरीका अनुसार होटललाई आफ्नो सरसफाइ स्थिति र खाद्य प्रविधि सुधार गर्न ७ दिनको म्याद दिइएको छ ।
यसका साथै, दूषित खानेकुराका कारण बिरामी परेका सबै व्यक्तिहरूको उपचारमा लाग्ने सम्पूर्ण खर्च सम्बन्धित होटल संचालकले नै व्यहोर्नुपर्ने निर्देशन समेत समितिले दिएको प्रमुख पुरीले बताउनुभयो । बजार क्षेत्रका होटल तथा क्याफेहरूमा पछिल्लो समय खाद्य स्वच्छताको विषयलाई लिएर उपभोक्ताहरूले चिन्ता व्यक्त गर्न थालेका छन् ।